راتبي مُش مُباح قصيدة الوقفة الاحتجاجية الرابعة بالتربة
إفرحي ياسعاد زغردي يانشراح
قالوا راتب تعز رجعوه من( سَناح )
كان مسافر ازال ؟ باح واليل باح
لابن بنت النبي او حفيد الوشاح ؟
ياحكومة سجاح بَسْ يكفي مزاح
انا قلبي وجيع كله منّك جراح
كيف راتب تعز رجعوه من سناح ؟
ماعرفش الطريق؟ والا خاف من (جُباح )؟
مش مهم من صرف أو امر بالسماح
المهم راتبي أين سار واين راح ؟
قال رجع بنكنا وافتهن واستراح
وايحين اشتصرفوه؟ قال بكره الصباح
ومن صباح لَ صباح آح وقلبي آح
كلهم يخبطوك قَصْْدْ فوق الطفَح.
قالوا من يغتلب ياحكومة استراح
انّما راتبي مُشْ لغيري مُباح
والله ما شَغتلب لو يطول الكفاح
وانا واقف هنا مستمر بالصياح
مطلبي راتبي إفهمو يارباح
مثّلوا واكذبو والعبوا بالضياح
أنا واقف هنا بعدكم قاح بقاح
مهما طال الزمن راتبي مُش مباح
وانت ياصاحبي مايفيد النياح
مطلبك راتبك؟ هذا درب الكفاح
امّا في بيتكم راتبك طاح. .طاح.
انا واقف هنا وقفتي الرابعة
يامحافظ تعز لا تكن إمعة
ياجنوب ياشمال بسّنا جعجعة
مطلبي راتبي شغلوا المطبعة.
أنا واقف هنا وقفتي الرابعة
مطلبي راتبي بطلوا الدنبعة
قبل ترجع لكم صيحتي زوبعة
تتخطا الوزير وتقصف الصلعة.
خالد سلام المقرمي
17 ابريل 2017.
